ಬಾಲಮಂದಿರದಲ್ಲಿ ಶಾಸಕ ಜಮೀರ್ ಖಾನ್ ಜನ್ಮದಿನಾಚರಣೆ.

ಕೊಪ್ಪಳ,ಆ.೦೧: ಜೆಡಿಎಸ್ ಪಕ್ಷದ ರಾಜ್ಯ ನಾಯಕ, ಮಾಜಿ ಸಚಿವ, ಬೆಂಗಳೂರಿನ ಚಾಮರಾಜಪೇಟೆ ಶಾಸಕ ಬಿ.ಜೆಡ್.ಜಮೀರ್ ಅಹ್ಮದ್ ಖಾನ್ ರವರ ೪೯ನೇ ಜನ್ಮ ದಿನಾಚರಣೆಯನ್ನು ಶನಿವಾರದಂದು ಇಲ್ಲಿಗೆ ಸಮೀಪದ ಭಾಗ್ಯನಗರದಲ್ಲಿರುವ ಸರಕಾರಿ ಬಾಲಕಿಯರ ಬಾಲಮಂದಿರದಲ್ಲಿರುವ ಅನಾಥ ಮಕ್ಕಳೊಂದಿಗೆ ಕೊಪ್ಪಳ ನಗರ ಯುವ ಜೆಡಿಎಸ್ ಕಾರ್ಯಕರ್ತರು ಕೇಕ್ ಕತ್ತರಿಸಿ ಸಿಹಿ ಹಂಚಿಸಿ ಜನ್ಮ ದಿನವನ್ನು ಆಚರಿಸಿದರು.
    ನಂತರ ಜೆಡಿಎಸ್ ನಗರ ಯುವ ಅಧ್ಯಕ್ಷ ಸಯ್ಯದ್ ಮೆಹಮೂದ ಹುಸೇನಿ ಮಾತನಾಡಿ, ನಮ್ಮ ನಾಯಕ ಜಮೀರ್ ಅಹ್ಮದ್ ಖಾನ್‌ರವರ ಈ ಜನ್ಮ ದಿನವನ್ನು ಇಲ್ಲಿನ ಬಡ ಮಕ್ಕಳೊಂದಿಗೆ ಆಚರಿಸುತ್ತಿರುವುದು ಸಂತಸ ತಂದಿದೆ. ನಮ್ಮ ನಾಯಕರ ಆಶೆಯಂತೆ ಜನ್ಮದಿನವನ್ನು ಆಚರಿಸಲಾಗಿದೆ. ಬಡ, ನಿರ್ಗತಿಕ ಜನರ ಕಲ್ಯಾಣಕ್ಕಾಗಿ ಅವರು ಸದಾ ಶ್ರಮಿಸುತ್ತಾ ಬಂದಿದ್ದಾರೆ. ಇಂತಹ ನಾಯಕರ ಅವಶ್ಯಕತೆ ನಮ್ಮ ನಾಡಿಗೆ ಅವಶ್ಯಕವಾಗಿದೆ ಎಂದು ಸಯ್ಯದ್ ಮೆಹಮೂದ ಹುಸೇನಿ ಹೇಳಿ, ಜನ್ಮ ದಿನದ ಶುಭ ಕೋರಿದರು.
    ಈ ಸಂದರ್ಭದಲ್ಲಿ ಮುಖ್ಯ ಅತಿಥಿಗಳಾಗಿ ಜೆಡಿಎಸ್ ಯುವ ನಾಯಕ ಹಾಗೂ ಮುಸ್ಲಿಂ ಶಾದಿಮಹಲ್ ಆಡಳಿತ ಮಂಡಳಿ ಸದಸ್ಯ ಮೊಹ್ಮದ್ ಮುಸ್ತಫಾ ಕುಷ್ಟಗಿ, ಹಿರಿಯ ಪತ್ರಕರ್ತ ಎಂ.ಸಾದಿಕ್ ಅಲಿ ವೇದಿಕೆಯ ಮೇಲೆ ಉಪಸ್ಥಿತರಿದ್ದು, ಜೆಡಿಎಸ್ ಯುವ ಕಾರ್ಯಕರ್ತರಾದ ಇರ್ಫಾನ ಹುಸೇನಿ, ಸದ್ದಾಂ, ಮೌಲಾಹುಸೇನ, ಚಾಂದಪಾಷಾ, ವಿನಯಕುಮಾರ, ನವೀನ, ಪ್ರಶಾಂತ, ರವಿಚಂದ್ರ ಸೇರಿದಂತೆ ಜೆಡಿಎಸ್ ಕಾರ್ಯಕರ್ತರು ಮತ್ತು ಅಭಿಮಾನಿಗಳು ಪಾಲ್ಗೊಂಡಿದ್ದರು.